43 炮台山

變種蟹源源不絕，雖然在孖根的槍下，變種蟹只要稍露破綻便會被瞬間擊殺。但即使如此，牠們還是鍥而不捨地迫近！消耗戰如此持續下去，敗陣的最終一定是孖根她們。

這時，流主終於走到平房的天台，他立即使用雷射步槍進行狙擊。由於狙擊的位置居高臨下，流主在沒有任何阻擋下成功擊中了變種蟹王，變種蟹王痛得退後了數步，看來牠的防禦力並沒有比變種蟹高，反之可能更差！相信再一槍，流主便可以將牠擊殺。

「再嚟！」流主減慢時間，施予最後一擊

就在流主要再次攻擊的電光石火之際，變種蟹王抬頭從口中向流主射出超音波！流主此料不及被超音波擊中頭部，隨即失去平衡跌倒在地上！雖然超音波並未對流主構成太大的物理傷害，但是強烈的脈衝卻為他的腦袋帶來震盪，他頓時感到強烈耳鳴，而且更眩暈眼花得不能瞄準！

然而，隨著腦震盪，一把奇怪的聲音在流主的頭顱內迴響著．．．

「．．．係你地人類嘅錯．．．係你地人類濫殺生命．．．係你地人類污染地球．．．係你地人類污染海洋．．．係你地人類破壞我地嘅家園．．．係你地人類迫我地．．．」

流主一時間呆滯下來．．．是因為受到超音波衝擊？是因為突如其來的聲音？還是因為聲音所說的一番話．．．？

「主主！！我地頂唔住啦！！」鎖匙萱大叫

流主被鎖匙萱的聲音喚醒，他立即猛力拍一拍自己的腦袋，並在頸上注射治療針！

「．．．對唔住。」流主說著，便舉槍再次狙擊

激光準確無誤地擊中了變種蟹王的頭顱，把牠半邊的腦袋轟得熔爛。隨著變種蟹王失去知覺倒地，群龍無首的變種蟹們也因為不敵孖根她們的槍火而開始陸續撤退，回到這片被不明液體所污染的海洋．．．

．．．．．．

「太好啦！真係唔知要點樣多謝你地。」正勢力的巡邏隊隊長說

「啊．．．嗯。」流主點一點頭

「嗰班變種蟹人人得而誅之，不過都好，宜家有咁多變種蟹肉，起碼可以有足夠食物提供比依條村嘅災民。如果你地有啲咩需要，即管講，我地幫到一定幫！」巡邏隊隊長笑說

阿寶接著說：「其實我地趕住返總部，如果方便嘅，可唔可以借架車比我地？」

「借比你地就睇怕唔得啦．．．」巡邏隊隊長想了一想續說：「．．．不過我地隊員陣間會去炮台山車啲補給返嚟，你地唔介意嘅可以跟車過去，嗰邊資源多啲，應該可以幫到你地。」

於是，流主他們便決定乘坐正勢力的小型貨車到他們的另一個據點，炮台山。

「寶寶．．．其實你又係正勢力，佢又係正勢力．．．」鎖匙萱指著正在駕駛的正勢力女隊員：「點解你係要主主坐前面呢．．．？」

「．．．．．．咁流主係我地隊長呀嘛．．．而且又係黃金小子．．．」阿寶攔詞抵辯

正在駕駛的正勢力女隊員說：「我地到啦，你地記得同指揮官報到左先好四圍走。」

炮台山是正勢力在香港島的一個軍事據點，它位於正勢力總部，金鐘，的東邊，靠著海岸的它同時也是防守海岸防線的哨站。

在正勢力的守衛帶領下，流主他們來到了位於炮台山中央一幢只剩下下半部份的大廈。不過，雖然這裡已經是正勢力的領地，但即使有他們的成員打理，大廈還是凌亂不堪。

引路的守衛說：「前面就係會議室，副指揮已經喺入面等緊你地，指揮官都好快會到。」

流主他們推門進內，映入眼簾的是一個雜亂無章、滿地滿桌文件紙張的房間。而房間中央的書桌前，坐著一個載著眼鏡、舉止斯文的女子。

女子看到阿寶便雀躍不已：「阿寶！好耐無見啦！」

「呃．．．．．．好耐無見．．．副指揮．．．」阿寶卻沒有甚麼高興的反應

「做咩咁見外？叫返我麗雅得啦。」女子笑說

「啊．．．嗯．．．其實我地趕緊去總部．．．希望妳地可以借車比我地．．．」阿寶結結巴巴地說

「無問題呀，不過做咩事咁趕？係咪發生左咩事？有無嘢我地可以幫到手？」麗雅問

「其實．．．依位係流主．．．」阿寶介紹著：「佢係嚟自2077年嘅黃金小子．．．」

這時，另一個女子剛好走進來會議室，搭話說：「2077年？黃金小子？？」

「家姐！」麗雅對著女子打招呼

阿寶頓即退後了兩步，點一點頭說：「．．．指揮官。」

「做咩咁見外？叫返我美雅得啦。」女子說：「你話佢係黃金小子．．．係真嘅？？」

「．．．佢載住嘅嗶嗶小子．．．就係最好嘅證據．．．」阿寶說

麗雅鎖起眉頭問：「咁．．．咁點算好呀家姐？」

「．．．宜家太夜啦，依度距離總部都有一段路程，而且最近依一帶有超級變種人出沒．．．你地最好都係喺度留一晚，聽朝我地搵人護送你地過去。」美雅說

麗雅接著向會議室唯一一個駐房守衛說：「你去安排幾間房同一啲嘢食比佢地啦。」

「係，我宜家即刻去。」駐房守衛說

「阿寶，你晏少少返過嚟再詳細交代一下成件事。」美雅說

「呃．．．嗯．．．．．．」阿寶臉色有點無奈

於是，流主他們便跟著守衛到另一個建築物，在守衛安排的房間內休息。

「阿寶，你識得頭先嗰兩姊妹架？」流主好奇問

「嗯，我同麗雅係學院同界嘅畢業生。」阿寶說

「學院？」鎖匙萱問

「每個啱啱加入，或者年滿十歲嘅正勢力成員都必須要接受一個叫做職業定位嘅測驗，然後組織會根據測驗結果安排幾個適合嘅科目比你修讀。畢業之後就去返相應嘅部門工作。我同麗雅就係喺機械工程課度識。」阿寶解釋說

流主有點驚訝說：「哇．．．無諗過一個民間組織會有咁完善嘅教育架構．．．」

「我地仲會免費教授廢土居民一啲基本嘅求生技能。」阿寶有點自豪地說

孖根說：「唔怪得有人話正勢力先係真政府。」

深夜，流主他們在房間內休息。不需要怎麼睡眠的孖根正在為武器做清潔和保養。此時，她聽到門外傳來一些對話聲．．．

「又會發生啲咁嘅事．．．」

「仲要係自己人．．．」

「估唔到佢會做啲咁嘅嘢．．．」

「佢地好似識左好耐架啦。」

「唉．．．不過都好彩捉得到佢．．．」

孖根忍不住走出房外問守衛：「．．．咩事？」

「啊？．．．啊，妳地唔使驚，妳地一直都喺房入面，我地可以證明妳地有不在場證據。唔使太擔心，妳地無嫌疑。」守衛說

「嫌疑？有人殺左人？？」孖根問

守衛點一點頭說：「係呀，咪就係司徒寶囉，佢殺左指揮官呀。」