雖然流主他們已經及時趕到處決現場，但最後卻仍然未能阻止處決．．．而且，流主更發現發哥在處決女疑犯的一剎那，竟然咧嘴笑了！
「屌那媽！！」流主一時失去理智，猛地揮拳打向發哥！發哥隨即被打跌在地上
「守衛！！」跌在地上的發哥大吼
現場的食屍鬼守衛馬上向流主舉槍！
「流主！冷靜啲！！」阿寶立即上前拉住流主
「唔好使用暴力呀！」豆也上前調停
發哥怒火中燒：「你依個仆街人類唔好得寸進尺！你以為我真係唔敢殺你呀？」
「汪！！」狗肉護主心切，馬上進入戒備狀態
孖根和鎖匙萱也上前嘗試冷靜現場情況．．．
「夠啦！！」程天突然大喝：「大家仲死唔夠人咩？？」
眾人頓時都沉默下來．．．
程天激動續說：「宜家人唔死都死左啦．．．成件事就咁算啦．．．．．．冤冤相報何時了呀？你又殺佢，佢又殺你．．．係咪要大家都死清光先安落呀？？」
發哥不屑說：「我只係還返個公道比死左嘅兄弟姊妹。」
程天無奈說道：「咁宜家還左啦？？我求下大家，唔好再製造不必要嘅衝突同流血．．．我地咁辛苦建立兩地嘅友好關係，為相方帶嚟更好嘅生活．．．唔好因為仇恨而將依啲心血白費．．．好嗎？？」
「哼，睇在你份上，今日嘅事就咁算。程天，唔該你好好睇住你班人類，再有同類嘅事情發生，我會用返同樣嘅手法處理。」發哥說畢，便揚袖與手下一同離去
處決完結，心情複雜又無可奈何的群眾也只有默默散去．．．
「多謝你地幫忙．．．麻煩到你地真係唔好意思．．．」程天在自己的旅館招待流主他們
流主慚愧說：「唉．．．我地最後都係做唔到啲咩．．．對唔住．．．」
程天愁眉苦臉說：「你地已經為我地做左好多架啦．．．只怪依個世道，大家連抖啖氣都無可奈何．．．」
聞言，眾人也沉默了一陣子．．．
程天續說：「你地慢慢食啦，我去睇下仲有啲咩可以幫下個婆婆。」說畢，他便離開了
鎖匙萱失落地說：「結果都係幫唔到個婆婆．．．」
阿寶略帶無奈，但仍然理性地說：「咁我地的確係搵唔到實在嘅證據。」
豆問：「我想問呢．．．流主係點知有另一個著住隱形裝甲嘅兇手嘅．．．？」
阿寶不耐煩說：「喂大佬，你醒少少當幫忙得唔得呀？」
鎖匙萱拍拍豆的肩膀說：「主主當時係情急起上嚟亂講架咋，連我都睇得出啦。」
「就係咁先奇怪．．．」豆摸著頭說：「連萱萱都睇得出係大話．．．但係發哥嗰一刻又真係信．．．．．．佢睇落唔係咁蠢．．．」
眾人聞言也不禁愣了一愣．．．
鎖匙萱瞇著眼說：「豆豆你咩意思．．．」
阿寶有點愕然：「諗落又有道理．．．發哥無可能會蠢過鎖匙萱．．．」
鎖匙萱一臉不爽：「喂！」
流主說：「唔通比我亂講講中左．．．係同隱形裝甲有關？」
「我明啦。」阿寶分析說：「當時食屍鬼守衛攻擊咁凌亂唔係因為目標快，而係因為目標識隱形！尋晚狗肉食到成嘴係嘅，根本就係隱形裝甲被打中而流出嘅電池液！」
孖根聞言愣了一下，好像想到了甚麼事情．．．
「咁即係發哥早早就知？？」鎖匙萱驚訝問
「我諗唔止係咁．．．」流主凝重說：「睇怕．．．發哥就係兇手．．．」
「無可能！」豈料，孖根卻斬釘截鐵否定：「發哥絕對唔會殺其他食屍鬼。」
阿寶說：「但係照流主所講嘅方向推敲，發哥應該係有心嫁禍欣澳嘅居民，分化欣澳同鄉土嘅關係。」
流主補充說：「依樣正正係我所諗嘅嘢．．．佢就係用隱形裝甲暗殺嗰幾個食屍鬼守衛，然後製造機會令個女人執起把槍．．．等大家都以為個女人就係兇手，激起鄉土嘅民怨．．．」
「不得了．．．」阿寶汗顏說：「咁樣，成件事就解得通啦．．．」
孖根有點激動：「發哥唔會咁做！我同佢識左咁多年，我好清楚佢為人！」
「妳咁樣係意氣用事。」阿寶冷言
「總之佢一定唔係兇手。」孖根斷言
「要證明真偽．．．睇怕只有一個方法．．．」流主說
鎖匙萱搶著說：「等我去啦，潛入搵嘢係我嘅強項，只要睇下佢有無收埋隱形裝甲，就知道係咪佢做。」
「咪住！」孖根說：「．．．今次等我嚟。」
相比白天，香港廢土的晚空並沒有太多烏雲，有些時候更可以看到皎潔的月亮和星河，空氣嗅起來也好像比白天的清新，尤其是位於郊區的鄉土，聆聽著悠悠晚風在耳朵旁邊吹過的動人聲音，不但不會感到死寂，反而會有一陣悠然自得的寧靜感覺。
然後，孖根小心翼翼地來到發哥的住所．．．雖然孖根的隱匿能力並不能與鎖匙萱相提並論，但是她本身也非等閒之輩，隱藏行蹤潛入探物等技巧，勉強還可以應付得來。
孖根使用小刀輕輕把發哥住所的前門撬開：「．．．發哥依個鐘數通常都喺酒吧．．．要把握機會。」
她慢慢把前門推開，果然一如所料，住所內漆黑一片空無一人。她馬上爭取時間把房子翻了一遍，每一個抽屜和角落也徹底地清楚搜查。最後，她來到了一個牢牢鎖上的金屬大箱子前．．．．．．可是，她卻沒有足夠技巧把鎖解開．．．
「妖！咁麻煩架．．．」經過多番嘗試，她仍然無法把箱子打開．．．於是她拿出一柄螺絲起子：「夾硬撬爛佢算啦．．．如果佢係清白嘅，最多之後請返佢飲酒道歉啦！」
她使勁強行把大箱子撬開，吞了吞口水，緊張地往箱子裡看．．．．．．
「果然．．．．．．真係無！」大箱子裡只有一些槍械和彈藥，並沒有甚麼隱形裝甲
看著眼前的大箱子，孖根總算鬆了口氣。一向重情重義的她與發哥相識多年，兩人也曾經是一同闖蕩江湖的拍擋，她們經歷過不少生死場面和危急關頭，感情可能比她和流主更深。孖根知道這次謀殺事件的「隱形人」，毫無疑問便是當日在欣澳醫院襲擊她的「隱形人」，所以她不能、也不想相信發哥便是真兇。
然而，這時候有人突然從身後向孖根偷襲，一張鋒利的長劍猛地砍去！她反應過來，立即向旁邊翻滾，把這致命偷襲避開了．．．可是，她舉槍轉身過去，發現背後根本沒有人．．．
「隱形裝甲．．．」孖根全神貫注留意四周的動靜
這時，對方又再從旁向孖根攻擊，不過這次孖根早有心理準備，她轉身躲開攻擊同時馬上舉槍還擊，成功打傷了這個穿著隱形裝甲的敵人！
「投降啦，你唔會係我嘅對手。」孖根說
「．．．妳真係要殺我？」那人說著，便慢慢脫下隱形裝甲的頭盔．．．而這個人．．．．．．竟然真的是發哥．．．
