18 神秘的大廈

流主他們尋找著可以留宿的地方，然而因為愈來愈接近戰區，他們不得不小心一點。

「流主。」孖根和流主躲在一輛毀壞了的汽車後靜靜觀察著，她示意流主看看她所指著的方向

「．．．．．．我咩都睇唔到喎．．．」流主看了一會，卻除了隨風飄揚的垃圾和損毀的建築物外，便甚麼都看不到

「．．．嗰度有一點火光，睇嚟係一支啱啱食完嘅煙頭，即係有其他人喺度，小心。」孖根說著便俯身慢慢前進

「啊！．．．．．．其實我咩都睇唔到．．．」流主俯身跟著走

狗肉也很懂事，靜靜地跟著流主他們。孖根每前進一段距離便停下來觀察，流主則合作地欣賞著孖根俯著身子的美妙姿態．．．配合她的舉手投足，修身皮革就像快要被她的巨乳豐臀擠破般充滿迫力！

「．．．去嗰邊。」孖根回頭說

「啊．．．好。」流主回神過來說

小心翼翼的他們總算來到剛才旅人所說的數座住宅大廈，可是它們大都已經倒塌或燒光了，只剩下一座比較完整的，不過相信也沒有甚麼補給可以撿了。

正當他們打算進入建築物時，突然有一些硬物的撞擊聲從不遠處傳來！

「小心。」孖根和流主立即蹲下來靠在住宅大廈的牆壁上：「聽落似係一啲空心嘅金屬物件。」

「．．．會唔會係垃圾桶？」因為天色昏暗，流主根本看不清楚

「我過去睇下，你小心啲。」孖根說著便悄悄地走向聲音來源的方向

「嗚．．．．．．．．．」

然而，孖根才剛離開，流主背後突然傳來很小但卻很清晰穿透的女子哭聲！流主嚇得寒毛直豎，立即轉身舉槍！可是，卻甚麼都沒有．．．狗肉也開始有點緊張，立即隱身了．．．

「．．．明明聽到有人喊架．．．．．．」流主十分疑惑，但也不敢掉以輕心

流主用緊張得不停冒汗的雙手牢牢地握著雷射步槍，慢慢前進．．．．．．終於他走到大廈牆壁的轉角前，他小心地探頭偷瞄出去，竟然發現有一個女子坐在花槽前抽泣！她一頭烏黑長髮、皮膚潔白得幾乎跟她的裙子一樣．．．

「小姐？妳無事呀嗎？？」流主放下槍走過去

「嗚．．．．．．」她轉身看著流主，原來是一個大美女！

「小姐．．．做咩事？得妳自己一個？？」流主問

「嗚．．．．．．我男朋友呢．．．？」美女哭著問

「．．．妳地走失左？？」流主憂心問

「嗚．．．．．．我想搵佢．．．嗚．．．」美女哭著說

這時，孖根回來了說：「流主？」

「孖根？」流主回頭

「你喺度做咩？」孖根問

「無呀，個女仔話想．．．」流主回頭，卻發現那個女子已經不見了：「咦！？」

「．．．你無嘢呀嘛？」孖根問

「唔係喎．．．啱先係有個女仔喺度．．．．．．唔通又識隱形？狗肉係咪你朋友嚟．．．？」流主問

「嗚．．．？」狗肉側著頭好像聽不明白

「撞鬼呀你？」孖根說：「我嗰邊睇左無問題，嗱嗱臨入去啦。」

「．．．．．．唔係真係撞鬼掛．．．」流主頓感毛骨悚然

流主他們穿過早已被打破了的玻璃門進入大廈，這裡完全沒有燈光，漆黑一片。流主打開嗶嗶小子的照明燈，小心地探路前進。為防有土匪進入大廈會發現他們的行蹤，特別是這種高樓大廈，他們都不主張在地下或一樓留宿。

他們沿著樓梯往上層走，嚇然發現走廊有一些喪屍在徘徊。

「你喺度等。」孖根拿出一張小刀：「我搞掂佢地。」

孖根說著，便向走廊拋出一支發出紅光的照明棒，然後便大模斯樣走出去．．．

「．．．喂．．．孖根．．．」雖然流主相信孖根的能力，但仍然擔心如此無防備地走出去的她

然而，流主的擔心看來是多餘的。意想不到，那些喪屍完全沒有攻擊孖根的意思，不知道是因為看起來不大分別的關係，還是，它們真的把孖根當成是同類？

然後，孖根不費吹灰之力便把眼前的喪屍都殺掉了。

「行得。」孖根示意流主出來

此時，在模糊的紅光映照下，流主嚇然發現孖根身後不知何時站著一個人形的身影！！

「孖根！小心後面！！」流主馬上拔槍攻擊

激光筆直地穿過孖根身邊，射向目標。自從孖根開始教導流主槍法，如非必要，流主也鮮會依靠嗶嗶小子來瞄準，久而久之流主的槍法也愈來愈好。看著激光的軌跡，流主深信他已經擊中目標，但是激光消退後，卻發現他的攻擊原來落空了！

孖根轉身看過去，卻沒有甚麼在她的背後。

「咦．．．？」流主一頭霧水

「．．．你肯定你無事？」孖根也疑惑起來

「唔係喎．．．明明真係有個人影．．．」流主解釋著

「係咪暗得滯你睇錯咋？鬼影都無隻喎。」孖根說

「．．．又講鬼．．．．．．」流主又感不寒而慄

然後，他們來到三樓一個單位，隨便打掃了一下便住下來。

「．．．你抖下啦，我諗你係因為接近戰區所以精神緊張。」孖根一邊餵著狗肉一邊說

流主確實是感到有一股說不出的壓力，這使他不由得緊張起來．．．．．．

他們兩人都沉默了很久。

流主嘗試找些話題來分散緊張感：「係呢，頭先點解啲喪屍唔攻擊妳嘅？」

「我都唔係好知點解，但係喪屍係從來都唔會攻擊我地，可能因為大家都係食屍鬼掛。」孖根說

「咁妳．．．唔會殺唔落手咩？」流主不好意思地問

「啊？．．．點解呀？」孖根反問

「．．．咁妳話佢地同妳都係食屍鬼．．．唔會因為咁而殺唔落手咩？仲要係為左我依個「人類」．．．」流主有點忌諱地問

「呵呵，咁你呢？你殺人類嘅時候有無落唔到手？」孖根笑問

流主猶像被當頭棒喝了一下，一時間不懂回答

「食屍鬼又好、人類又好、香港人又好、中國人又好、美國人又好、甚至係貓仔狗仔都好，身份只係人類自己諗出嚟。對於大自然，唔理你嘅軀殼係點，你嘅職業係咩，都一視同仁係一個平等嘅生命。喺我眼中，無種族、無國籍、無貴賤、無好壞，只有自己人或者敵人。」孖根說

17 戰前城市

經過兩天的努力，流主雖然找到了大部分歷史，但卻仍然找不到任何有關伊甸園創造器的情報，而且這些歷史看來對他的記憶沒有太大幫助。於是他們只有先離開鄉土再作打算，順道探訪一下欣澳。

「我地嘅英雄返嚟啦！」程天一看到流主他們踏進賓館便雀躍不已

「欣澳宜家點呀？一切有好轉嗎？」流主關心地問

「疫病已經穩定左好多啦，村民接受治療之後都陸續康復，加上宜家同鄉土結盟，唔使再擔心背腹受敵，終於都可以鬆口氣，好好休息一下。」程天高興得笑起來

「咁咪好囉，幫到大家就好啦。」流主笑說

「係喎，今日啱啱好係商隊送物資嚟嘅日子，為左報答你，陣間你就喺物資入面隨便揀啲啱心水嘅嘢啦！」程天說

流主他們也不好意思拒絕，於是便跟著走到村口迎接商隊。未幾，數輛印有FAT-P的貨車沿著大路駛至，隨行還有數個身穿灰色軍服、臂上印有橙色U記標誌的人類和食屍鬼騎著電單車護航。

「咦！？佢地係U記？？」流主回想起前陣子的戰鬥，不期然緊張起來

「唔使慌，灰衫嘅U記係護衛隊，佢地只會保護僱主，唔會主動攻擊。」孖根說

商隊的陣容不小，除了數個裝備齊存的U記外，商隊自己的人也同樣都配備了精良的先進裝備。

「村長，麻煩你點點貨。」一個衣著斯文大方，只配備一支手槍的中年男人走過來

程天拿著一疊單據上前查看，數個村民便幫忙把物資搬上手推車。此時，一個U記的食屍鬼走過來跟流主他們搭訕。

「妳咪痴孖根？同鄉喎！．．．咁你就一定係流主啦。」U記食屍鬼竟然知道流主

「吓？你點解會識我嘅？？」流主大感不惑

「哈哈，樹大招風呀嘛。你搞左咁多嘢，又殺過我地啲人，仲要群埋痴孖根，個人頭自然會值返啲錢嘅。」U記食屍鬼笑說

「唔係掛！？有人想殺我？？？」流主嚇得臉也灰白了

孖根插話說：「爆啲料嚟聽下。」

「孖根姐叫到，就放啲料比妳地啦。痴孖根宜家值45,300蚊，流主原價3,200，因為同孖根一齊，所以現價30,000。可惜呀，未有買家。」U記食屍鬼說

「未有買家？即係點呀？」流主不解問

「即係宜家未有人想殺你，但係根據你做過嘅嘢，例如殺過啲咩人，特別係我地啲人，同埋做過啲咩好事壞事，尤其係阻我地好事等等，我地會評估殺你所需嘅最低價大概係幾多錢。有晒資料有晒價，先容易同啲老細傾呀嘛，你地如果有人想殺都可以搵我地架。」U記食屍鬼解釋說

「我無啦啦又貴左嘅？」孖根若無其事地說

「妳之前阻我地做嘢，唔單只殺左我地十幾人，仲連個買家都殺埋，過四皮嘢好合情合理啦。」U記食屍鬼笑說

流主想了一下問：「．．．你指青衣城嘅宗Sir？」

「係呀，佢死左，我先唔怕話你地知。不過提醒你地，通常對付過左四萬蚊嘅目標，老闆都會派超級變種人。雖然宜家未有人傾啱價，但係想殺孖根嘅人都唔係少，妳地自己好自為之啦。」U記食屍鬼笑著說完便離開了

商隊離開後，流主他們也應程天邀請在餐館用晚餐。

「咁少夠架啦？」程天問

「夠啦．．．」流主摸著肚子說：「邊食得到咁多．．．」流主已經吃了兩份變種甴曱肉和四條變種螞蟻腿

「我係話物資喎。」程天說

「都夠啦，太多我地又拎唔到啫。」流主笑說

「啊係呀，我幫你地打聽過啦，雖然唔知伊甸園創造器喺邊，但係聽講依個儀器係戰前嘅美國科技．．．我諗，政府或者正勢力嘅人會有多多少少嘅情報都唔定。」程天說

「咁邊度可以搵到佢地啲人呀？」流主問

「政府就喺香港最北邊，正勢力就最南．．．不過，有一個地方係好容易就可以搵到佢地啲人．．．」程天說

「．．．係邊度？」流主眼睛睜大問

「．．．．．．戰區。」程天神情凝重說

戰區，位於香港廢土的正中央，曾經是一個人流集中的經濟商業中心。更因為繁榮蓬勃得有如未經核戰蹂躪，而被譽為「戰前城市」。然而在2189年，各大小城鎮都出現不少反對政府的聲音。而眾多城鎮中尤其戰前城市的反對聲音最強烈，更多次引起大大小小的衝突。最終在該年的6月4日，政府出兵在戰前城市大肆屠殺反對他們的人，打算殺一儆百。豈料，屠殺過後卻竟然有大量居民群起反攻，最終政府寡不敵眾，元氣大傷的政府便把所有政府軍撒回到北邊。

自此，香港廢土東、南、西和中部地區都變成了無政府狀態。後來，香港廢土的居民都稱這戰役為「六四之戰」。

由於六四之戰把戰前城市徹底摧毀了，該地的商業活動都完全消失，遺下了大量物資和財富，引來了各大勢力包括政府軍和正勢力來爭相搶奪。直至今天，那裡仍然戰火不斷，因此被廢土居民列為普通人的禁地，並給予了一個新的名稱，「戰區」。

流主和孖根還有狗肉離開欣澳，再次踏上旅程。

「咁附近有無城鎮或者廢置左嘅建築物可以過夜呀？」流主問路過的數個旅人

「你地向依個方向行會見到幾座廢置嘅住宅大廈，不過我唔肯定會唔會有土匪喺入面．．．」其中一個旅人說

「唔該你地。」流主道謝說

「．．．．．．你地真係要去戰區呀？」旅人再三問道

「．．．嗯。」流主輕輕點頭

流主看看天空，已經由灰白色漸漸變成黑色，氣溫也隨著天色變冷。離開欣澳已經數天，從地圖來看，他們已經走了大半路程。然而愈是接近戰區，他們便前進得愈慢，也愈是小心。因為他們害怕戰區外也會有戰火或埋伏。

16 歷史

流主為了幫助欣澳，也為了幫助鄉土，正努力說服食屍鬼之父幫助欣澳的居民。

「首先要以成為同盟作為幫佢地嘅條件。由佢地代表鄉土對外貿易，而你地就負責欣澳同鄉土嘅保安，同時保護商隊同幫助佢地擴大行商路線。咁樣就可以做到互相制衡而又互相得益，各取所需，求仁得仁！」流主解釋說

「即係軍權喺我地度，就唔使怕佢地反口．．．唔．．．．．．」食屍鬼之父俯首沉思

發哥焦急起來：「老豆，你唔係真係信個人類講嘢下話？？」

「．．．除左以同盟做條件，我仲即時要買佢地一半嘅物資。當然，如果佢地比嘅價錢唔公道，我會用子彈嚟買起晒佢地條命。」食屍鬼之父說

「老豆！你係咪痴左線呀！？」發哥十分激動

「我決定左係就係啦。」食屍鬼之父揚手示意發哥退下

「．．．．．．哼！！將來你一定會後悔今日信左依個人類！！」發哥憤怒得咬牙切齒，拂袖而去

於是，獲得了食屍鬼之父的同意，流主他們隨即回到欣澳並把提案交給程天。在沒有太多選擇餘地下，程天接受了協議，更親自帶同數個村民駕車把物資送到鄉土。食屍鬼之父也欣然接受了程天的開價。最終在和平的氣氛下，鄉土和欣澳正式成為同盟。

一星期後，欣澳醫院的輻射終於清理完畢，他們更把那個不知道是誰設置，洩漏著輻射的儀器放在鄉土當作醫療設備。而與欣澳的交易中，除了彈藥武器和載具外，也換來了不少電油，使鄉土可以使用小型發電機發電。欣澳方面，疫病也終於被穩定下來，村民也可以再次使用醫療設施，總算達到了雙嬴的局面。

「流主，你做得好好，唔使一粒子彈、唔使流一滴血，就解決左一直困擾鄉土嘅問題。」食屍鬼之父讚揚說

「唔好客氣，我好高興我幫到手。」流主客氣說

「你令我對你地人類稍為改觀。我可以點樣報答你？」食屍鬼之父問

「我希望可以睇下你地收藏嘅歷史記錄。」流主說

「無問題，我陣間叫人帶你去資料庫。仲有無嘢我可以幫你？」食屍鬼之父問

「．．．．．．你知唔知邊度可以搵到伊甸園創造器？」流主想了一想問

「好可惜，我未聽過依樣嘢。」食屍鬼之父搖頭說

雖然不知道伊甸園創造器的下落，但能夠查閱過去二百年的歷史，相信對流主也有莫大的幫助。於是流主便跟著守衛走到鄉土地底的資料庫，意想不到這裡的藏書量居然多得幾乎把上千平方尺的資料庫迫滿。

「依度就係啦。所有戰前嘅書都係我地喺廢土搵返嚟保存，雖然唔齊，但係咩嘢範疇都有。而另一邊書架嘅書就係我地過去二百年入面所見所聞嘅記錄。」守衛耐心解釋說

「咁多．．．有排睇．．．」流主呆眼說

「如果你有指定搵啲咩，可以問下管理員。」守衛說完便離開了

孖根少有地苦笑說：「諗起我嗰陣本日記就驚．．．」

「日記？」流主問

「嗯，我地每個鄉土嘅居民每次出去都要帶埋自己本日記，記低喺廢土遇到嘅嘢，再由管理員整理做資料。」孖根說

「咁即係妳宜家都有寫？」流主問

「無啦，我已經唔係鄉土嘅居民，所以唔使再寫。我始終都係鍾意自由自在、四圍旅行嘅生活。」孖根說

「咁咪仲啱，就係要成日旅行先有嘢寫。」流主笑說

「就係多嘢先更加唔想寫。」孖根笑說

『2066至2074年，中國政府一直處於裡外受敵的惡劣形勢。除了美國和其同盟的威脅，還有一些引發內亂的恐怖組織不斷破壞內政。香港的情況更是多個中國地區裡受害最嚴重的一個。

「黃金力量」是一個勾結外國勢力的恐怖組織，他們以黃金色的絲帶作記認。初期只以擾亂秩序和破壞公物為主，後期在解放軍取代香港警隊後，他們更煽動人民暴動，做成多個解放軍軍人死傷。2074年後更發生過多次暴力衝突，死傷達百多人。』

流主閱讀著戰前的書籍說：「關於戰前最重要嘅資料係依啲．．．睇嚟嗰個咩「黃金力量」都算係香港當時混亂嘅禍根。」

「．．．2074，我對當時嘅嘢都已經無咩印象啦。不過，我勸你唔好睇到咩就信咩。」孖根沉思了一下說

「．．．都啱嘅。．．．．．．咪住，孖根，其實．．．妳幾多歲？」流主不禁好奇

「核戰嗰陣35歲。」孖根若無其事地說

「2077年．．．35歲．．．．．．哇！妳235歲！？」流主嚇了一大跳

「哈哈哈！」孖根捧腹大笑：「無諗過你咁大反應。」

關於核戰，對於是誰先發射第一枚核彈已經完全無法考究。唯一可以肯定的是，中美雙方都有發射。而戰後的歷史，綜合了孖根所說和鄉土的文獻記載，在核戰發生後，香港進入了接近一年的黑暗時期。灰塵和核粒子把天空掩蓋，所有植物在短時間內枯死。大量變種生物如食屍鬼等開始出現。

2090年開始，陸續有倖存的人類回到地面，開始各自重建社區。

2130年，香港突然開始下雪，廢土出現了短時間的冰河時期，雪季過後，香港開始出現局部地區在冬季會下雪的現象。

2143年，香港政府重新成立，開始有政府軍在廢土出沒，並向各大小城鎮徵稅。

2211年，鄉土正式成立。消息很快傳遍整個廢土，大部份的食屍鬼也逃難到鄉土。

2241年，部份不滿政府的廢土居民在香港南邊組織了名為「正勢力」的反政府組織，更以當年「黃金力量」的黃金色絲帶作記認，在廢土對居民作有限度援助。同時間不知何時成立的「Ultimate Unit」，即「U記」，的名聲開始響起，不少商家都會僱用這個傭兵組織來保護自己或對付對手。然而，雖然U記是一個受僱殺人的組織，但是因為他們並不會濫殺平民，所以並不受廢土居民排斥。

2256年，在香港東邊出現一個由數十個女性人類發起的激進武裝組織，名為「Bitch Kingdom」。她們以女權主義為宗旨，成員都會載上粉紅色的面具以作識別，她們更會生擒人類男性作奴隸。

15 食屍鬼之父

流主和孖根正跟著發哥去找食屍鬼之父，希望可以跟他商討欣澳的事，也希望可以取得收藏在鄉土內的歷史紀錄。

「多謝妳．．．無諗過咁嘅情況，妳都會企喺我依邊．．．」流主感激說

「係因為我知道發哥唔會開槍啫。」孖根說

「妳點知．．．？」流主好奇問

「發哥好多年前同我係拍擋，我同佢亦已經識左好多年，佢雖然做嘢手段強硬，但係佢係絕對唔會傷害食屍鬼。」孖根說

「．．．原來係咁，咁佢其實都唔係好衰呀。」流主說

他們跟著發哥來到了一個被護城河包圍著的城堡，遠看雖然宏偉，但走近了卻發現它意外地小．．．

發哥說：「老豆就喺入面。」

走過了一條小吊橋，流主他們步進小城堡的內部。燈火陰暗的這裡比實際看來更要狹小，而且光滑的牆壁和地磚看來也不像是一個城堡。往裡面看，有一個頂著塑膠皇冠的食屍鬼坐在一個豪華的皇座上，他雖然如其他食屍鬼一樣全身腐爛，但氣宇軒昂的他舉手投足都散發著領導者的氣勢。而且身邊還有數個配有衝鋒槍的部下陪同著，毫無疑問他便是食屍鬼之父了。

發哥點頭說：「老豆，我帶左孖根同佢個人類朋友嚟。」

「啊？做咩又返嚟？」食屍鬼之父問

「孖根，妳自己同老豆解釋。」發哥不悅地瞪著孖根說

孖根上前向食屍鬼之父點一點頭說：「老豆，我地希望你可以救欣澳。」

食屍鬼之父用火柴點起一口香煙說：「妳從來都唔好管閒事，相信要求我嘅係妳嗰位人類朋友，而唔係妳。既然係咁，就請依個人類自己解釋。」

流主走上前說：「．．．欣澳宜家出現疫病，但係咁啱佢地儲存醫療物資嘅醫院因為一個不知明嘅儀器洩漏輻射，令佢地唔可以入去拎藥物同使用自動醫生。所以希望你地可以派人幫佢地清除輻射。」

「發哥已經同我討論過，我知道佢地宜家情況惡劣，所以我先讚成發哥把握時機將佢地斬草除根。你宜家倒轉想我去幫佢地，唔通你唔知你地人類對我地做過啲咩？」食屍鬼之父說

「我知人類對你地做左好多好過份嘅嘢．．．但係依啲已經係上一代嘅事，宜家欣澳嘅居民係無份害你地，亦無害過你地．．．何必要趕盡殺絕？」流主說

發哥插話說：「哼，你係人類緊係咁講。」

「咁你地又唔算係人類咩？你地同我地生活方式有咩唔同？」流主問

食屍鬼之父笑說：「後生仔，我地係食屍鬼。我地除左外表同你地人類唔同之外，我地無生育能力，亦唔會自然死亡，而且我地唔會病，藥物酒精亦好難對我地產生作用。就連輻射我地都唔怕，甚至輻射可以治療我地。咁樣，我地都算係人類？」

「既然係咁，點解你地要食飯要取暖？點解要飲酒要食煙？你地大可以搵個有輻射嘅地方生活，點解要同人類用同一種生活方式生活？我亦都知道你地收藏左好多歷史紀錄，點解你地要咁做？就係因為你地心入面，你地嘅靈魂，仍然認知自己係一個人類。就算軀殼唔同左，唔等於你地唔係你地。」流主說

「．．．．．．」食屍鬼之父沒有回答

「人類又好，食屍鬼又好，都一樣有感情。我地同樣識得愛、識得恨、識得笑、識得喊；我地仲同樣會開心、會傷心、會掛念、會後悔，所以我地都一樣係人類。唔通性無能就唔係人類咩？唔怕輻射就唔可以係人類咩？」流主說

發哥激動說：「我地先唔係性無能！我地只係無生育能力！！」

「咪係囉，所以，你地點解唔係人類？食屍鬼只係一個名詞，只係用嚟區分我地嘅背景咋嘛。」流主說

「哼．．．．．．」發哥無言以對

食屍鬼之父說：「就當我地係人類，但係都講唔通點解我地要幫佢地。人類就一定要幫人類嘅咩？」

「咁唔通人同人之間就只有戰爭？」流主反問

「哈哈，問得好。」食屍鬼之父笑著續說：「咁你又殺過幾多人？」

「．．．我．．．．．．」流主一時間不知道如何回答

「點解你又要殺人？」食屍鬼之父追問

「因為保護自己、保護人．．．仲有為左成個城鎮嘅居民．．．」流主回想著青衣城的事說

「我地宜家一樣係為左保護自己、保護人同保護鄉土，何罪之有？」食屍鬼之父說

「但係佢地根本無攻擊你地，唔通打一啲無反抗能力嘅人就係保護自己？佢地根本無惡意，我相信一定有兩存其美嘅解決方法！」流主說

「有咩方法好得過報仇雪恨，斷絕後患同時得到物資？」發哥一臉不屑說

「．．．有，就係救佢地。」流主認真說

「哈哈．．．」食屍鬼之父笑著說：「咁真係要講嚟聽下。」

「鄉土唔係一直都有資源不足嘅問題咩？其實主要原因係因為外界嘅商人唔肯同你地做交易，亦唔會刻意穿過欣澳嚟同你地交易。」流主說

「咁又點？依啲嘢我地早幾十年已經知。」食屍鬼之父說

「你地依度有錢，亦有充足嘅野生動物做食物，而且地大近海，天然資源充足。欠嘅就只係科技同技術。而鄉土有咁多人，當中一定有唔少技術人士。即係話，你地欠嘅可能只係科技。而要得到科技，就一定要有貿易，要有貿易，就一定要有途徑同外界接觸。」流主說

孖根插話問：「．．．用欣澳做媒介？」

「無錯！欣澳有科技有資源，好明顯係因為有穩定嘅貿易，亦證明欣澳係喺商隊嘅行商路線之中。佢地可以作為中間人，代替鄉土同外界接觸。除左地利，亦因為佢地係「人類」，又一直有同商隊來往，佢地同商隊嘅信賴關係一定好穩固，絕對可以為鄉土帶嚟生機。」流主說

「．．．有道理。」食屍鬼之父認真起來

「痴撚線！」發哥很大反應：「我地點可以信佢地？？我地點證明幫左佢地之後佢地會幫我地！？」

「你地可以同佢地協議，制訂一啲互惠互利嘅條件。」流主說

「．．．你有咩提議？」食屍鬼之父問

14 上一代的恩怨

擾攘一番，流主他們終於能夠進入鄉土了。這裡的環境和建築都十分特別，有很多樣子有趣的卡通人物雕像，還有奇形怪狀、特色主題的餐館和店舖。不過，最格格不入的，並不是在這個充滿童真的地方充斥著外表如死屍般的食屍鬼，而是流主這個唯一的人類．．．．．．整條街上的食屍鬼都用各式各樣的奇異目光注視著流主．．．看來好像隨時都會找他麻煩似的．．．

「放鬆啲啦，佢地唔會對你做啲咩嘅。」孖根說

「個個都睥住我．．．點放鬆呀．．．」流主無奈地說

「呵呵．．．」孖根笑說：「咁你明我地食屍鬼喺廢土嘅心情啦？」

流主跟著孖根走，沿途意料之外發現這裡的食屍鬼生活方式都比較原始，室內也只依靠火把來照明，而且大部分的食屍鬼也只穿著薄如紙張的破爛衣服，大家只能在垃圾桶生火取暖．．．

然後，他倆來到一個酒吧。

酒保一眼便認出孖根：「痴孖根？好耐無見喎！返嚟做咩呀？」他如見著好友般高興

「返嚟搵老豆。比啲好嘢嚟飲下，仲有無自家製雞尾酒？」孖根興致勃勃地坐在吧台前

「雞尾酒？我地連伏特加都賣晒啦．．．」酒保苦笑說：「啤酒就有，妳要唔要呀？」

「唉．．．所以你話點解我要走．．．．．．啤酒都照殺啦。」孖根失望地說

「人類，你係孖根朋友呀？飲乜柒？」酒保友善地問，但還是看得出他不太喜歡人類

「我要核子可樂得啦，唔該。」流主坐下來說

「嚟酒吧飲可樂．．．？」酒保不屑地端上一瓶核子可樂

「咪搞鳩我朋友啦，老友。」孖根遞給酒保20元：「廿蚊唔使找。」

酒保收錢後便繼續忙自己的活兒。

「唔．．．大家都真係好憎人類喎．．．」流主對被歧視感到十分無奈

「你唔好怪佢地，依度好多食屍鬼都係曾經比人類排擠、虐待、甚至追殺而走到嚟依度，你話佢地點可能唔憎人類。」孖根大口喝下啤酒續說：「相反，你地人類大部分歧視我地都只係因為我地嘅外表。乜鬼嘢驚我地會變喪屍．．．多鳩餘。」

「．．．係呢，頭先喺城門妳提到上一代嘅恩怨．．．係咩嘢事？」流主問

孖根嘆了一口氣說：「．．．六七十年前，嗰陣依度未叫做鄉土，喺度定居嘅食屍鬼仲係好少。當時有一班為數數十人嘅食屍鬼逃難緊嚟依度，而帶隊嘅就係發哥。佢同佢老婆連日趕路逃避追殺，幾經波折先逃出魔掌。眼見仲有無幾多路程就可以嚟到依度，但就偏偏喺路過欣澳嘅時候出事。」

「．．．同佢老婆有關？」流主猜說

「嗯。」孖根點了一下頭說：「其實當時成個香港廢土嘅人類都嚴重歧視食屍鬼，所以佢地一直都披住斗篷掩飾身份。但係唔好彩去到欣澳嘅時候敗露左行蹤．．．因為當時情況混亂，動火嘅原因已經無從考究，少數走得甩嘅食屍鬼憶述返，當時根本就係一場屠殺，佢地連反擊嘅餘地都無．．．而發哥嘅老婆更比人綁喺十字架活生生咁燒死。」孖根的眼神流露了一絲憤怒

「．．．會唔會只係誤會．．．？」流主大膽假設

「有乜撚嘢誤會要綁起一個手無寸鐵嘅女人嚟燒？你知唔知要燒死一個食屍鬼係需要幾長時間？」孖根的呼吸變得沈重，看來是在抑壓著自己的情緒

「．．．．．．」流主無言以對

孖根喝了一口啤酒，嘆道：「不過依啲已經係上一代嘅事，宜家欣澳嘅人已經唔同左。我唔敢話唔同晒，不過我知道佢地後生依一代諗嘢係唔同左。其實鄉土一直都處於自我封閉嘅狀態，外人亦因為咁樣而唔太願意同鄉土交易或者發展貿易關係，令到依度嘅科技、生活質素同軍力都比人地落後。依度能夠咁和平，又無土匪，其實唔多唔少係因為有欣澳擋住。如果鄉土同欣澳打起仗上嚟，欣澳未必會輸。」

「難怪大家好似咁窮．．．」流主說

酒保突然插話：「哥仔，我地唔係窮，係有錢無地方使啫。」

孖根說：「其實鄉土好有錢，因為當年大戰，依度無點受到波及，所以當大家嚟到嘅時候，依度仲有好多完整無缺嘅貨幣可以用。」

酒保說：「可惜無商隊肯嚟做交易呢．．．唔係依度蛇蟲鼠蟻多，我諗我地要食銀紙都似！」

晚上，流主他們回到街上到各式各樣的商店買賣。果真如酒保所說，這裡都沒有甚麼可以購買．．．這名副其實是「窮得只有錢」，十分諷刺。

第二天早上，他們離開旅館正打算找發哥看看能否與「父親」會面，卻發現發哥正帶著數十個全副武裝的食屍鬼走在街上。

「發哥，發生咩事？帶咁多人去邊？」孖根問

「．．．我同老豆傾過，宜家係最好嘅時機將欣澳一網打盡。」發哥說

「吓！？尋日唔係咁講個喎！」流主十分驚訝

「依度係我地話事！幾時到你依個人類出聲！」發哥大喝

流主立即擋在他們面前：「我唔會比你地亂嚟！有事可以慢慢講，無必要動刀槍，更何況乘人之危！」

「守衛！！」發哥大喝一聲，附近的守衛和他的下屬皆一呼百應，立即舉槍指著流主！

「發哥你冷靜啲先．．．」流主說

「你憑咩叫我冷靜！」發哥也舉槍指著流主

豈料，孖根突然舉槍指著發哥：「．．．你估你開槍快，定係我開槍快？」

「孖根．．．妳竟然為左一個人類用槍指住我！？」發哥十分意外

「佢係我朋友，亦係我恩人，我唔會比佢死。一係，你就殺左我先，如果你得嘅話。」孖根在這種情況竟然還能一臉自信

「妳．．．．．．！！」發哥憤怒得雙手發抖

「．．．．．．」孖根完全沒有退讓的意思

「．．．．．．哼！．．．算！我宜家就帶妳地去見老豆。」發哥放下槍說

其他食屍鬼也接著放下武器，並聽令回到各自的崗位。孖根則神態自若地收起手槍，若無其事地和流主一起跟著發哥走。

13 鄉土

孖根極度不願意地和流主跟著欣澳的村長來到這座三層高的醫院。

程天拜託著：「最重要係查證有輻射嘅原因，但如果方便嘅．．．都拎啲補給品出嚟．．．」

孖根沒有回答便瀟灑地走進醫院。醫院裡十分整潔，看來真的如程天所說，他們村過往一直都使用著醫院。孖根簡單地走遍了第一層，便直接走到第二層。

「頭先你地話去鄉土，係為左好重要嘅事？」程天點起香煙問流主

流主說：「唔．．．都幾重要下。」

「好難得有人類會同食屍鬼同行．．．」程天呼了一口煙說

「．．．．．．雖然我只係識得兩位食屍鬼朋友，但係佢地都係好人，我唔明點解大家要歧視佢地。」流主說

孖根來到二樓，但仍然沒有發現甚麼特別。她把沿途看到的一些補給放進程天給她的袋子，也把一些放進了自己的袋子。然後，她來到了三樓。

這時，孖根開始感到愈來愈精神，身體好像充滿力量般：「睇嚟輻射源喺附近。」

她向著輻射最強烈的方向探索，果然，在三樓一個房間的門上看到一個圓餅形的電子儀器。就在她慢慢走近時，一個人影突然從旁撲出！！

「唉．．．」程天嘆道：「依啲都係上一代積落嚟嘅錯．．．我地自己其實都唔憎食屍鬼，但係偏偏又有啲食屍鬼憎我地．．．最重要係，其實宜家大家都無對對方做過啲咩傷害．．．根本已經變成左種族恩怨。」

「恩怨？」流主想了一想說：「．．．．．．會唔會係大家將件事諗得複雜左。」

「係又好唔係又好，都唔到我地依一代嘅人去控制．．．」程天愁眉苦臉說

「．．．．．．」流主沒有說話

敏捷的孖根避開了偷襲，這才發現襲擊她的是一個穿著全身烏黑緊身裝甲、手持一把利刃的男子。

「你係咩人？」孖根問

那男子沒有回應，但看到孖根後，好像知難而退般從窗戶逃走了！孖根立即追上去，但那個人已經消失了．．．

孖根疑惑著：「隱形裝甲．．．？」

流主和程天在餐館等候了個多小時，孖根終於回來了。

「點呀？查唔查到啲咩？？」程天緊張問

「妳無咩事呀嗎？」流主有點擔心問

「呵呵，都係流主你關心我，真係抵錫。」孖根開玩笑說

「呃．．．」流主不知應該如何反應

「啲輻射嚟自三樓一個睇落成個地雷咁嘅電子儀器，你有無印象？」孖根問

程天想了一下，疑惑地問：「地雷？三樓邊個位置？可唔可以形容得仔細少少？」

「最東邊盡頭一間房嘅房門上面。黑色圓形一餅嘢咁，直徑大概兩尺左右。我對科學嘢同爆炸品無咩認識，所以唔敢貿貿然走埋去。」孖根吃著烤老鼠肉說

「妳肯定？我完全無印象有件咁嘅嘢．．．」程天又再按著前額

「咁．．．點算好？我對依啲嘢都唔熟，就算熟．．．我都入唔到去．．．」流主思考著說

程天有點不好意思地說：「我．．．有一個方法，但係又要麻煩你地．．．．．．」

程天續說：「你地頭先咪提過你地去緊鄉土嘅．．．嗰度住左咁多食屍鬼，當中一定有人熟悉科學或者爆炸品．．．」

孖根斷言說：「我唔認為佢地會幫你。」

「我都知．．．但係我只可以拜託你地．．．去說服佢地．．．」程天苦著臉說

流主想了一會：「．．．．．．我地試試啦。」

第二天的清晨，天空還是依舊灰色一片，氣溫也愈來愈低。每逢冬季，除了氣溫低下，北邊的香港廢土更會下雪，而且土匪也會比平常更踴躍地四出「打獵」一些粗心大意的目標。不少流浪的人和動物也因為抵禦不了氣候或受到偷襲而死亡，因此香港廢土的冬天是非常危險的季節。

「向住東南方行，幾個鐘左右就到。」孖根說

「其實點解妳咁肯定鄉土唔會幫欣澳啲村民嘅？」流主好奇問

「人類本來就同食屍鬼唔啱架啦，我都一樣有比人類追殺過。」孖根說

「咁好似我同妳，仲有他伯同阿麥咁，都一樣做到朋友呀。」流主說

「咁唔只我地，其實有啲城鎮同組織都接受食屍鬼嘅。不過大部分人類都會先入為主排斥左我地先，而且好難會有平等嘅對待。」孖根若無其事地說

說著說著，他們來到一個荒廢了的鐵路站前，旁邊有一條大路通往一個已經停止了的噴水池。

「我地到啦。」孖根指著噴水池後面一個數公尺高的拱形牌說

「Home Land．．．」流主閱讀著，牌上的後半寫著Land，前半則被釘上了一塊寫著Home的大木板

他們往裡面走，沿途的環境有別於一般市區，地方除了看來很悠閒，也很清潔，明顯是有人長期打理。然後他們來到了一個用木材建築而成的護牆前。

「你地係咩人？嚟做咩嘢？」護牆上的人說

「我嚟搵老豆，開門啦。」孖根拉下披風表明身份

果然，牆上的人向牆後的人打了一個手勢，護牆門便徐徐打開。接著有數個食屍鬼拿著衝鋒槍慢慢走出來。

「痴孖根？．．．依個人類係咩人？」一個身穿長褸，身上掛滿子彈的食屍鬼問

「佢係我朋友，唔使擔心。」孖根說

「朋友？」他懷疑地看著流主：「一個人類朋友．．．？」

「發哥，你連我都唔信？」孖根擋在流主前面說

「哼．．．返嚟搵老豆有咩事？」發哥有點不屑地問

流主說：「我地想調查過去二百年同戰前嘅歷史紀錄，另外亦想．．．」

發哥打斷流主的說話：「依度幾時輪到你講嘢？」

「．．．．．．」流主頓感萬分無奈，後面的食屍鬼也在暗笑著

孖根對流主打了一下眼色，示意把這件事交給她處理：「我地想問下老豆有關歷史嘅嘢，同埋代欣澳向你地求救。」

「幫欣澳！？妳無撚嘢呀？」發哥意想不到地大反應

「上一代嘅恩怨無必要拉到落依一代，而且我唔係打算同你傾，你帶我見老豆就得啦。」孖根說

「妳唔講清楚，我唔會比你見老豆！更何況妳帶住個仆街人類，佢係咪欣澳嘅居民？」發哥說著，他的手下立即擋在流主前面

「唔係個個人類都仆街嘅，流主唔係欣澳居民，佢係我恩人，我信任佢。宜家欣澳出現疫病，佢地嘅醫院又出左問題，搞到好多人唔係病就死。流主希望鄉土可以幫佢地，而我亦支持流主，所以希望可以見一見老豆。」孖根說

「．．．妳話佢地唔係病就死？」發哥停頓了一下問

「我呃你做咩？佢地宜家咁，你啖氣消晒啦？比我見老豆。」孖根說

「．．．佢今日唔方便見妳地，我亦唔知佢肯唔肯見妳地。我今次就破例比妳帶妳個人類朋友入嚟，我會去同老豆講聲，睇下佢聽日肯唔肯見妳。」發哥說

「嗯，唔該。」孖根說

「．．．但係唔好話我唔警告妳，如果妳個人類朋友玩嘢．．．我就唯妳事問！」發哥瞪了一下流主，對孖根說

12 輻射塵

雖然流主看不到孖根的眼神．．．但流主確切地感覺到她的傷感。

「．．．．．．」流主沒有說話，只是默默地聆聽

「戰爭，根本同我地普通人無關。我地無得選擇立場、無得選擇打唔打、甚至無得選擇走唔走。上面嘅人話要打，我地下面嘅人就要陪葬．．．當核彈炸到嚟嘅時候，上面話要打嘅嗰班人，亦只會保護佢地自己．．．然後睇住我地死。」孖根說

「．．．．．．」流主仍然沉默，沒有經歷過核戰，他根本不能說些甚麼

「當時，我帶住我兩個女走，我地匿左入一個地下停車場．．．希望戰爭快啲完結．．．但係一匿，就唔知匿左幾耐．．．我地帶喺身嘅食物一早已經食晒。終於我地硬住頭皮，冒險走返上地面．．．」孖根一邊說，一邊收拾地方作休息之用

孖根續說：「但係我萬萬無諗過，外面已經係一個地獄．．．．．．倒塌嘅大廈、裂開左嘅馬路、化成灰嘅植物．．．不過，最此料不及．．．係地面原來仲充滿住輻射．．．我嘅皮膚不斷腐爛、毛髮不斷脫落．．．我知道我已經感染左輻射．．．但係我仍然話比自己聽，唔可以比兩個女有事．．．」說著，孖根身體開始發抖

「孖根．．．．．．」流主不知道可以說甚麼

「我即刻拖住佢地，想帶返佢地落停車場．．．．．．點知．．．佢地見到我．．．嚇到係咁喊．．．話我係怪物叫我唔好行埋去．．．」孖根拉下披風，露出一副從來沒有人在她臉上看過的失落表情：「佢地好驚．．．驚到亂咁跑．．．我即刻追住佢地．．．．．．結果，睇住佢地一路跑一路腐爛．．．最後全身溶爛而死．．．．．．我唔明點解偏偏我死唔去．．．甚至到宜家我都唔明點解自己仲未死．．．帶住依個連自己兩個女都驚嘅核突軀殼．．．好似啲變種甴曱咁苟且偷生．．．．．．」

流主一整晚都沒能說話，只能和狗肉一起靜靜地陪著孖根．．．．．．

第二天的早上，他們很早便醒來繼續趕路。

「流主，瞄準係有技巧，唔係舉起支槍指著住人就打得中。」孖根教導流主使用小型槍械的技巧

「咁唔係點．．．？我已經姿勢好正確．．．」流主舉著槍說

「瞄準唔係講姿勢，係講求快同準。射得中，就係正確嘅姿勢。」孖根說

「．．．鬼唔知咩．．．」流主無奈說

「你要想像支槍係你身體嘅一部分。」孖根續說

他們一邊走一邊說，於黃昏時段來到了一條村莊。雖然這裡有不少看來運作正常的車輛和修輯良好的建築物，但是卻連一個守衛也沒有，人口好像也很少。

「歡迎嚟到欣澳！有咩想搵，有邊度想去，即管問我！」一個看來是本地乞丐的男子笑容燦爛並打開手掌說

「我地想搵個地方食嘢同過夜，仲有做啲買賣。」流主說著，並在乞丐的手掌上放下一個五元硬幣

「直行到尾轉個彎就係村長開嘅賓館，餐廳就喺賓館嘅側邊，買賣嘅話就去後街啦，嗰度咩舖頭都有架！」乞丐笑說

孖根問：「條村點解咁少人嘅？」

「．．．．．．」乞丐沒有說話，但又再打開手掌

「．．．．．．」孖根也沒有說話，但不知何時已經舉槍指著乞丐

「哇哇哇！冷靜冷靜．．．細佬純粹搵兩餐糊口，無謂浪費靚女妳寶貴嘅子彈係咪？價錢嘅嘢好死嘅！妳想比幾多咪幾多，多多益善少少無拘，最緊要靚女妳比得舒服呀嘛！或者妳地考唔考慮下買個欣澳一日遊？我同妳地介紹返。」乞丐說

「砰」的一聲，孖根在乞丐的耳邊開了一槍

「其實小村近日出現疫病，大部分市民都病入膏肓、久久臥床不起．．．村長一直希望有哪位英雄好漢能夠拔刀相助伸出援手雪中送炭，解救欣澳於水深火熱之中！」乞丐立即學乖了

「夠啦，村長喺邊？」孖根說

「就喺佢嘅賓館之中，就等細佬為兩位引路，依邊請！」乞丐恭敬地示意流主他們跟著他

流主他們跟著乞丐走，沿路的確看到不少面青唇白、目光呆滯的村民．．．情況可能真的如乞丐所說般嚴重。

數分鐘步行，他們來到了一個五層高，呈凹字型的舊式建築物。雖然有部分損毀的地方用上了不搭調的廢鐵和木材來修輯，但整體來看還是感覺穩固舒適。

即使孖根並不讚同，但流主還是額外支付了二十元給乞丐。

他們走到賓館的接待處前等了一會，卻仍然沒有人出來接待他們，於是流主按了數下桌上的響鈴。果然，隨即有一個看來很疲累的老伯跌跌碰碰地走出來。

「唉．．．唔好意思．．．無諗過仲會有客到．．．兩位要一間房？」老伯喘著氣問

「請問你係咪欣澳嘅村長？」流主問

「啊，係呀，我係欣澳嘅村長程天．．．請問有咩事呢？」老伯問

「我聽講你地村有疫病，我想睇下有無啲咩嘢我可以幫到手。」流主說

「吓？？」程天有點愕然

流主一臉疑惑：「．．．做咩呀？」

程天眉頭緊皺說：「點解呀？．．．無啦啦做咩想幫我地呀？」

「無呀，我地其實去緊鄉土，路過依度咪順便幫下手囉。」流主說

「香港原來仲有好人．．．？」程天想了一下續說：「．．．我地的確係遇到好大問題．．．我地村依幾個月唔知邊度傳嚟啲傳染病，體質弱少少嘅村民都已經病晒．．．甚至有人病死左．．．」

「你地依度無醫生同藥物嘅咩？」流主疑惑問

「唉．．．我都唔知係報應定乜鬼嘢，咁啱我地存放藥物同補給品嘅醫院唔知點解有輻射．．．我地已經因為咁死左好多村民．．．雖然話，我地仲可以同商隊買到藥物，但係我地村無醫生．．．而一直依靠嘅自動醫生又正正係放喺醫院入面．．．都唔知點算．．．」程天按著前額說

「咁．．．有咩我地可以幫到手？」流主問

「唉，除非你地唔怕輻射嘅啫，如果唔係都幫唔到我地啲乜．．．」程天無奈說

「咁又係．．．」流主看著孖根說

「．．．．．．」孖根沒有回應

「．．．．．．？」程天不明所意

「．．．．．．」流主繼續看著孖根

「．．．．．．好啦好啦．．．」孖根拉下披風說：「．．．唉．．．．．．希望你唔係諗住幫晒沿路見到嘅人．．．」

「原來妳係食屍鬼嚟架？咁就太好啦！」程天高興得雙眼發光

11 向西出發

殺死了宗Sir後的第一個早上，他伯和阿麥在商場的正門外把所有真相和盤托出，並把所有在控制室找到的抗輻射藥分派給市民。同時，雖然有部分餘下的高級市民極度反對，但在大部分市民的同意下，決定廢除市民分級制。所有青衣城的市民皆可進入商場範圍，只有外人需要得到批准才可進入。

三日後，在孖根的協助下，阿麥成功把發電機的輻射洩漏大大減弱。孖根的傷也因為輻射的影響而自然痊癒了。

「我地青衣城真係唔知可以點多謝你．．．」成為了臨時決策人的他伯說

「傻啦。」流主笑說：「你比左咁多補給我，我都未多謝你．．．」

回復了精神的維琪問：「你真係唔留低呀？」

「唔啦，我聽孖根講話西邊有一個食屍鬼城鎮，入面有戰前同過去二百年嘅歷史紀錄，可能可以幫我搵得返我嘅記憶，所以我一定要去。」流主說

他伯點點頭，笑說：「咁好啦，我地都唔留你啦。不過記得，我地青衣城隨時都歡迎你！」

維琪捉著流主的手，羞答答說：「多謝你．．．有時間，返嚟探下我．．．地．．．．．．祝你一路順風！」

流主跟他們道別後，和狗肉再次踏上旅程。他們走到青衣城的城門前，孖根正雙手交叉放在胸前，倚在城門邊等待著。

「妳真係肯同我地一齊去？」流主問

「講左係就係啦。你救左我條命，我條命就係你嘅。唔好講咁多啦，我地仲有好長嘅路要行。」孖根說

在西邊有一個只有食屍鬼居住的城鎮，名為「鄉土」。她是由一班被排擠的食屍鬼所建構而成，其中的領袖是一個被譽為「食屍鬼之父」的食屍鬼。鄉土的居民通常都簡稱他為老豆。因為他是最年長的食屍鬼，所以也被認為是第一個食屍鬼，食屍鬼之父這個名稱便是因此得來。

流主他們走了大半天，但距離目的地還有大段距離。

流主看看深藍色的天空，指著前方一個矮小的建築物說：「天都黑啦，我地入前面幢嘢度過一晚啦。」

孖根沒有異議，於是他們便進入建築物。

建築物內非常陰暗，大部分的燈都已經壞了。流主打開了嗶嗶小子的照明燈，發現這裡有一個服務台，牆上也貼了一些紀律部隊的海報，這裡看來是一個警察辦公室。

孖根凝視著天花板上數個早已被破壞的自動砲台說：「小心啲，裡面可能有人。」

他們慢慢往裡面走，發現地上有數條腐爛了的屍體，還有不少變種甴曱和變種老鼠。流主他們老實不客氣地把它們清除，並搜括牠們身上的肉作糧食。

此時，孖根突然問：「流主，想唔想鬥下槍法？」

「吓！？」流主不明所意

孖根沒有理會流主是否同意，便已經拔槍開火！流主立即把時間減慢，但反應得來時，子彈已經向流主飛過去了！流主連拔槍也來不及，更莫說閃避！

「哇！！！」子彈在流主的臉頰旁擦過，時間隨即回復正常，他也嚇得跌坐在地上

孖根走過去扶起流主說：「嚇親你唔好意思，放心我無諗住打中你。」

流主有點憤怒說：「妳痴咩線．．．無啦啦鬥咩槍法．．．」

「無心激嬲你，對唔住。」孖根道歉，續說「其實我只係想話你知，雖然我唔知你有咩「特殊能力」，但係如果你過份依賴佢，到你遇到我依啲級數嘅對手，你就必死無疑。」

流主驚訝說：「妳係點知道．．．」

「我依啲高手會睇唔出？你真係當我浪得虛名？我唔知你點解會有啲咁嘅能力，但係佢總有一日會累死你。」孖根說

「其實我都唔知依啲係咩能力．．．好似係嗶嗶小子比我嘅．．．佢令我可以將時間減慢同幫我計算攻擊嘅命中率同目標距離．．．」流主解釋說

「科學嘅嘢我唔識，但點都好，我勸你無咩必要都唔好用。對住強敵，依啲嘢全部都無用，只有自己嘅真本事先幫到你。」孖根說

流主摸摸頭說：「．．．咁不如你教我槍法啦。」

孖根輕輕笑了一下：「呵．．．等我考慮下。」

流主他們來到了建築物的二樓，這裡有一道因為被強行撬開而損毀了的門。他們必須俯身爬過去才能通過，於是流主便先掩護孖根過去。孖根探探頭確認了門後安全，便慢慢爬過去。孖根一邊蠕動一邊爬行，豐滿的胸脯、堅挺的美臀還有纖細的小蠻腰，確實讓人目不暇給．．．

「．．．妳準備好，咁．．．我嚟啦．．．」流主看著孖根已經過去了說

穿過破門，這裡是一個密閉的房間，除了一些垃圾便甚麼都沒有。

「依度有封信。」孖根撿起了地上的一封信

「已經一星期了．．．他們沒有怎麼給我們食物．．．．．．每天只是不斷輪姦我們．．．更說過會把我們吃掉．．．時間已經無多，我自己怎麼都沒關係．．．但我一定要把我兩個女兒救出去！我一定會把外面這些人渣殺得一乾二淨！」信上寫著

「封信背面有個手畫嘅地圖。」孖根說

「係喎．．．可惜都已經模糊晒，而且畫到咁求其．．．都睇唔出係邊度。」流主仔細看著說

孖根想了一會：「我諗係Bitch Kingdom。」

流主皺起眉頭：「Bitch Kingdom？」

「Bitch Kingdom係一個喺廢土東面嘅地方，亦係一個組織。入面大部分都係女人，名副其實嘅女人國。不過唔好因為佢地係女人就睇少佢地，佢地比土匪更可怕，男性特別要小心佢地。」孖根說

他們回到一樓，果然，地上的數具屍體當中，有一具是女屍，其身上更有一片錄音全息磁片，流主立即用嗶嗶小子把內容播放出來。

「終於．．．．．．妳地一定要生存落去．．．向住太陽走．．．我嘅小天使．．．我愛妳地．．．」一把女聲說

「．．．睇嚟，依個女人最後真係殺左強姦佢地嗰班人。」流主說

「．．．．．．」孖根沒有說話，默默蹲下來輕撫著女屍的臉頰。良久，她幽幽地說：「．．．．．．其實，佢同我幾似。．．．我曾經都有兩個女．．．佢地．．．都係我嘅小天使。」

10 為建設而犧牲

流主他們排除萬難，來到了宗sir的控制室．．．

「估唔到你地真係嚟得到依度。」穿著金屬裝甲的宗sir雙手都載上了能增加搏擊威力的動力拳套，看來他已經準備好一戰了

「你已經玩完啦，投降，交出所有抗輻射藥啦。」流主說

「投降？」宗sir反問：「我辛苦建設青衣城嘅一切，宜家你地要我投降，將所有心血比晒你地？」

他伯憤怒得大吼：「你話建設？你地過度用電，搞到發電機洩漏輻射，之後仲收起晒所有抗輻射藥，成個青衣城嘅居民都比你地班所謂嘅高級市民害死啦！」

「就係因為有輻射洩漏，我地先需要用所有嘅資源去保護我地嘅工程隊伍，等佢地可以盡快維修好發電機！」宗sir反駁說

「你講到咁好聽，咪又係為左你地自己奢侈嘅享受！」他伯說

「奢侈？我地嘅目標係發展成個城鎮，如果個發電機連淨係供應比商場範圍都已經超出負荷，我地點可以期望佢能夠為全城供應穩定嘅電力？我地只係想慢慢提高發電機嘅輸出，再作適當調整，令佢有一日真係可以為全城供電！為左咁，犧牲少少人係在所難免！」宗sir態度強硬說

流主質問：「咁點解你唔比抗輻射藥阿麥？」

「因為當時我地真係無足夠嘅抗輻射藥，而且根本無意識到輻射嘅洩漏程度已經咁嚴重。」宗sir解釋說

孖根問：「咁U記呢？點解你地要搵U記追殺阿麥？食屍鬼對輻射免疫大家都知，比佢打理發電機唔係仲好咩？」

「因為佢同他伯打算煽動群眾造反，我先唯有出此下策。宜家我只係撥亂反正，假以時日，當發電機可以供電比全城，青衣城就可以蓬勃起嚟，受益嘅就係全青衣城嘅居民！」宗sir說

流主說：「所以就由得大家感染輻射？」

「正如我頭先所講，犧牲係在所難免。而且我一定要將補給留比真正促進城市發展嘅人材，而唔係門外面嗰班只係為左自己，對社會毫無貢獻嘅低級市民！」宗sir激動說

流主不滿地說：「我唔能夠認同你。每一個市民都有存在嘅價值同生存嘅權利，點可以一句話要發展建設就犧牲佢地？你有無問過佢地嘅意願？你依啲，根本就係獨裁！」

「既然你地係咁無知短視，咁就唔好怪我！」宗sir說畢便載上了一個金屬頭盔

他毫不猶豫衝向流主，流主也立即舉槍攻擊。但是獵槍的子彈並未能貫穿宗sir的裝甲，更莫說要阻擋他的攻勢！他完全不理會攻擊，一拳向流主揮過去。幸好流主在時間減慢的幫助下成功躲開了攻擊，但是意想不到這落空了的攻擊，竟然強力得一擊便打破了流主身後的牆壁！

流主捏一把冷汗：「唔係掛．．．」

孖根對流主說：「睇住他伯佢地。」她提起雙槍施以猛烈攻擊，流主也立即示意他伯他們離開

但是，連獵槍也不能貫穿宗sir的裝甲，何況孖根的手槍？

「無用架！」宗sir轉向孖根

孖根只能一邊攻擊一邊後退，終於兩把手槍的子彈都射光了。

「哼．．．」孖根未能及時替手槍上膛

宗sir以動力拳套筆直打向孖根！就在即將擊中之際，狗肉突然出現，並用全身之力把宗sir撞開！流主和孖根立即爭取機會反擊，可惜宗sir依然絲毫無損．．．他們只有先退到控制室外。

流主汗顏說：「咁落去唔多掂．．．」

「你地走得去邊！！」宗sir一拳擊破牆壁追出來

孖根立即開槍攻擊，希望可以盡量擾亂宗sir的行動。流主把握機會回到控制室看看有甚麼可以使用，卻意外地找到了他的雷射步槍！流主想也不想便撿起它打算回去支援孖根，豈料才剛轉身便看到孖根被轟飛過來！！

「哇！！」流主被孖根撞個正著，兩人一同倒在地上

「咳咳．．．」孖根按著腹部，不斷吐血，看來受傷不輕．．．

「妳點呀？？」流主扶著孖根

「咳．．．做埋正經嘢先．．．」孖根捉住流主的手，流主才發現自己不小心捏著了她的胸脯．．．

流主嚇得立刻放手：「哇！！對唔住對唔住．．．」

「佢又嚟啦。」孖根指著前方

宗sir來勢洶洶從正面衝過來，沒有退路的流主他們只有放手一搏。孖根繼續猛擊，阻擋宗sir的來勢，流主也舉高雷射步槍瞄準。

「額頭．．．90%！」流主確認目標便立即不停地開槍

第一槍，跟實彈攻擊一樣並不太見效。但隨著第二第三槍不停追擊，宗sir的頭盔前額位置開始燒焦熔解！流主繼續乘勝追擊，但同時也因為感到時間快要回復正常而開始著急！

「死．．．啦．．．」宗sir和流主他們只有數步之距

第六槍，流主終於成功在宗sir的頭盔上打出一個洞！然而，流主的雷射步槍卻偏偏在這個時候用盡了電池！就算時間被減慢了，也不能讓流主更快速地替雷射步槍上膛！

此時，孖根以極快的速度舉槍攻擊。即使時間減慢了，流主仍然無法看清孖根舉槍攻擊的動作，她快得猶如不用瞄準便開火！子彈從孖根的手槍飛出，準確無誤地穿過宗sir頭盔上的小洞打進了他的腦袋！！

時間剛好在此時回復過來，宗sir立刻失去知覺倒在兩人面前。深紅色的鮮血慢慢從他的頭盔流出．．．看來宗sir已經一命嗚呼了。

「呼．．．」流主鬆了一口氣：「總算搞掂佢．．．」

「咳．．．」孖根虛弱地慢慢站起來

流主立刻扶著她：「妳得唔得呀．．．慢慢啦．．．」流主看著她有點弱不禁風的姿態，竟然有點心跳加速

「呵呵．．．」孖根拉下披風：「小事啦．．．」

「．．．．．．咁就好。」流主看到她的容貌．．．心跳的感覺頓時消失了

雖然大家也受傷不輕，但總算是收拾了宗sir。看著滿地的屍骸，流主從沒想過事情的發展會變成這樣。他不能確定誰是誰非，也不清楚那個才是最正確的選擇．．．但是因為這件事而死傷了不少人，是個不爭的事實。